Oranjestad, Aruba - 16 di april, 2015: Recientemente presidente di e federacion di boxeo Arubano, Arubox Sr. Marco Dupersoy a biaha pa e pais di Argentina unda e la atende e asamblea general di e Confederacion American di Boxeo, AMBC. E confederacion di boxeo ta un asociacion cu ta wordo controla y dirigi pa AIBA cu tin como obhetivo mehora, promove y propaganda e deporte di boxeo den tur forma den henter e continente America.

Na e asamblea a eligi un directiva nobo y mester bisa cu e representante di Aruba, Sr. Dupersoy a keda eligi como miembro di e comite ehecutivo di AMBC pa un periodo di tres aña. Remarcabel di esaki ta cu pa prome biaha den historia un miembro di boxeo di Aruba ta keda eligi den un directiva ehecutivo di boxeo. Ta bon pa bisa acerca cu a keda palabra cu nos referee y huesnan di boxeo na Aruba lo haya un seminario duna den luna di mei pa un experto di USA Boxing Board, Sr. Ray Silvas, esaki pa upgrade
nan propio conocemento riba e materia menciona.

Un danki sigur na Lotto, e Loteria di Aruba pa medio di Comision di Subsidio cu a subsidia e biahe di e presidente di Arubox pa asina e por a atende a Asamblea General di American Boxing Confederation.

Cumprando weganan di Lotto, e Loteria di Aruba bo ta contribui na deporte riba nos isla. Meta di e fundacion ta pa organisa loteria, cambia bida di su hungadonan y na mes momento inverti den deporte local pa medio di donacionnan na e comision di subsidio.