fbpx

Oranjestad, Aruba - 20 di mei, 2015: Den e programa di rendimento atletico, Al Training Performance Center (ATP Center) ta den full swing preparando diferente atleta y seleccionnan nacional pa e Weganan Panamericano y competencianan na nivel mundial y internacional.

 

 

Pa e grupo representando pais Aruba na Weganan Panamericano Toronto 2015 na Canada, ta preparando pre-seleccion “open team” di landamento sincronisa. Y na nan yegada na Aruba e duet team Anouk Eman y Kyra Hoevertsz lo incorpora nan mes den e ultimo fase di preparacion pa e weganan. E atleta Thashaina Seraus (Bowling) tambe lo continua su preparacion na ATP Center pa e weganan. Pa e grupo di atletanan aki e trayectorio tabata uno largo y di varios aña di preparacion y desaroyo pa logra yega na e nivel di weganan continental Panamericano aki.

 

Atletanan cu ta preparando pa competi na nivel mundial ta entre otro kitesurfer profesional di Aruba Annabel van Westerop cu despues di a tuma un break pa motibo di lecion na juli 2014, a cuminsa cu un programa di revalidacion y despues a bay over pa e programa di ”high performance sports strength and conditioning” cu coach Aldrick Maduro cu ta preparado fisico nacional di pais Aruba. Annabel a hasi su“comeback”na nivel mundial na maart 2015 ultimo y den su prome competencia ta competi den e prome rond contra ranking number 1 y 3 di mundo. E ta logra pasa 2 rond y ta yega semi final na unda e ta logra termina na di 5 luga comparti den su prome competencia di temporada 2015 den e Virgin Kitesurf World Championships (VKWC).

 

Pa windsurfing tin Ethan Westera cu ta saliendo pronto cu un programa di world tour PWA di windsurfing siguiendo pasonan di Sarah-Quita Offringa, kende tambe ora ta na Aruba ta prepara su mes fisicamente cu coach Aldrick na ATP Center. Apenas terminando su eind-examen HAVO, Ethan lo incorpora su mes den e world tour profesional di windsurfing (PWA) y sperando di sigui desaroya su mes na nivel internacional mundial. Tambe Quincy Offringa, Mack van den Eerenbeemt y Steven Max Lageveen ta preparando pa competi internacionalmente.

 

Atleta Renze Postma, ganador di premio excelencia atleta di aña local 2014, pa e temporada 2015 ta riba un bon trayectorio di desaroyo competiendo caba den 5 evento na nivel di Campeonato Continental y Regional di Camtri (Continente Americano di Triathlon) - ITU (International Triathlon Union). Akinan Renze a logra su miho puesto na maart 2015 na Lima, Peru den e Camtri Triathlon American Cup and Bolivarian Championship ocupando un di 11 luga.

 

Entre atletanan mas joven tin Renald Thiel (Bowling), Elias Halabi (Bowling), Jair Kelly (Bowling/Ciclismo), Justice Dreischor (Triathlon) y Elisabeth Timmer (Landamento) cu tambe ta den preparacion pa competencianan internacional den nan respectivo deporte. Tambe seleccionnan nacional di Ciclismo, Beach Volleyball Hubenil ta siguiendo programa di preparacion fisico cu coach Aldrick.

 

Al Training Performance Center y preparado fisico nacional coach Aldrick Maduro ta sumamente satisfecho cu e proceso y resultadonan te cu awor logra dor di atletanan cu ta preparando pa competi internacionalmente. Tambe cu un proyeccion sumamente positivo pa atletanan cu pronto lo representa pais Aruba internacionalmente pa e Weganan Panamericano na Toronto 2015, Canada y tambe otro campeonatonan y competencianan grandi internacionalmente.

 

Un danki sigur na Lotto, e Loteria di Aruba pa medio di Comision di Subsidio ta otorga subsidio na Al Training Performance Center pa asina nos atletanan elite y seleccionnan nacional por prepara nan mes debidamente pa competencianan internacional.

 

Cumprando weganan di Lotto, e Loteria di Aruba bo ta contribui na deporte riba nos isla. Meta di e fundacion ta pa organisa loteria, cambia bida di su hungadonan y na mes momento inverti den deporte local pa medio di donacionnan na e comision di subsidio.

 

 

DMC Firewall is developed by Dean Marshall Consultancy Ltd