Oranjestad, Aruba - 30 di juni, 2015: E dianan 27 di juni pa 1 di juli ta tumando luga e Central American and Caribbean Amateur Swimming Confederation na e isla Caribense di Barbados. E atletanan di landamento sincronisa di Aruba 12 Under ta cla pa saca cara na e campeonato aki. Den e ekipo aki tin algun atleta cu experencia internacional cu den pasado a competi pa Aruba den e campeonatonan di CARIFTA y CISC, pero e mayoria ta nobo den e area competitivo.

E deporte di landamento sincronisa ta un di esunnan di mas fuerte para den Caribe y Centro America, e resultadonan ultimo na e Weganan CAC di Veracruz a comproba esaki. Es mas, cu e resultado obteni durante di e Weganan CAC, e seleccion di landamento sincronisa a clasifica pa e Weganan Panamericano cu lo tuma luga den luna di juli proximo na Toronto, Canada. Notabel cu den tur competencia nos atletanan di landamento sincronisa semper tabata tin e seleccion cu e promedio di edad di mas hoben.

E seleccion di landamento sincronisa di Aruba lo consisti di e atletanan Sarah Silva, Janelly Piña, Caroline Kelly, Angelina Hamoen, Mikayla Morales, Avigayle Tromp y Ryxianne Malmberg. Como coach lo biaha Yami Romay y lider di delegacion lo ta Memita Tromp.

Un danki sigur na Lotto, e Loteria di Aruba pa medio di Comision di Subsidio cu a subsidia e participacion di e atletanan di landamento sincronisa na e campeonato di CCCAN na Barbados.
Cumprando weganan di Lotto, e Loteria di Aruba bo ta contribui na deporte riba nos isla. Meta di e fundacion ta pa organisa loteria, cambia bida di su hungadonan y na mes momento inverti den deporte local pa medio di donacionnan na e comision di subsidio.