Oranjestad, Aruba - 30 di juni, 2015: Recientemente un delegacion di tiro, seccion “Tiro Olimpico ISSF” a participa na e competencia Copa del Caribe y Copa Olimpico na Salinas, Puerto Rico. Team Aruba den e disciplina Olimpico “Air Pistol” a consisti di e atletanan Alvin Oduber, Phyll Marcano, Zuleny Oduber y Lisander Ignacio. Mester bisa cu e delegacion di tiro a logra un tremendo resultado unda a obtene varios medaya.

E atleta Alvin Oduber a logra triunfa cu varios medaya. Den e disciplina Centre Fire Pistol 25m, e atleta Alvin Oduber a logra gana un medaya di Oro. Den e disciplina Air Pistol, Alvin Oduber a gana medaya di brons y tambe den e disciplina di Standard Pistol 25m y Free Pistol 50m unda e ta logra dos medaya di brons mas. Como ekipo tambe Aruba a logra triunfa cu un medaya unda nan ta gana e medaya di Brons como ekipo. E delegacion di tiro Olimpico di Aruba sigur por mira bek tras di un resultado hopi satisfecho unda e miho tiradonan di e paisnan di Centro America y Caribe a participa na dje.

Un danki sigur na Lotto, e Loteria di Aruba pa medio di Comision di Subsidio cu a subsidia e biahe di nos atletanan di tiro Olimpico pa e campeonato Copa del Caribe y Copa Olimpico na Salinas, Puerto Rico.

Cumprando weganan di Lotto, e Loteria di Aruba bo ta contribui na deporte riba nos isla. Meta di e fundacion ta pa organisa loteria, cambia bida di su hungadonan y na mes momento inverti den deporte local pa medio di donacionnan na e comision di subsidio.