ORANJESTAD, Aruba - 29 di augustus, 2015: For di dia 7 pa 9 di augustus, un delegacion den e deporte di taekwondo a competi na e 2015 Pan American Taekwondo Youth Open na Chicago, Merca. E delegacion a consisti di 4 atleta den e categoria di cadet y junior, unda Aruba a wordo representa pa e dos rumannan femenino y alabes prospecto grandi den e deporte di taekwondo, Chiara y Sophia Petrocchi como tambe e dos atletanan masculino Alex Fernandez y Christian Croes. Como coach lo biaha Teofilo Rodriguez.
Mester bisa cu e competencia na Chicago ta sirbi como un preparacion pa un otro competencia grandi cu ta e Panamericano Cadet y Junior cu lo tuma luga den curso di e lunanan binidero na Aguascalientes, Mexico.
Recientemente e deporte di taekwondo a briya internacionalmente unda cu e atleta masculino John Jairo Maduro a bringa dos combate pa medaya durante di e Weganan Panamericano 2015 na Toronto, Canada. Esaki ta un muestra cu e deporte di taekwondo ta trahando duro pa yega competi na e nivel di mas halto y sobresali den torneonan bishita den exterior.
Un danki sigur na Lotto, e Loteria di Aruba pa medio di Comision di Subsidio cu a subsidia e biahe di nos atletanan di taekwondo pa e 2015 Pan American Taekwondo Youth Open na Chicago, Merca.
Cumprando weganan di Lotto, e Loteria di Aruba bo ta contribui na deporte riba nos isla. Meta di e fundacion ta pa organisa loteria, cambia bida di su hungadonan y na mes momento inverti den deporte local pa medio di donacionnan na e comision di subsidio.
