ORANJESTAD, Aruba – 2 di september, 2015: Diasabra ultimo 29 di augustus, Aruba Triathlon Association a organisa e Kids Aquathlon pa muchanan te cu 16 aña. E evento di aquathlon lo a inicia pa 7or di mainta, e biaha aki Pariba di Brug esta Rodgers Beach na San Nicolas. Por a participa como individual of den ekipo di relevo.

Tawatin tin tres categoria di Kids cual ta 5 – 6 y 7 – 8 aña cu lo a core 500 meter despues mester a landa un total di 50 meter y por ultimo core un distancia di 500 meter. Den e categoria di 9-10 y 11-12 aña esakinan mester a core 1km despues landa 100 meter y completa e evento unda mester a core 1km. Por ultimo den e categoria di 13-14 y 15-16 nan lo a inicia cu e careda di coremento riba un distancia di 1.5km despues landa 200 meter y completa e careda cu un coremento di 1.km.

Nos mucha y hobennan cu ta practica e disciplina nan di aquathlon, duathlon y triathlon ya caba ta cosecha exito den nan participacion internacional. Recientemente algun atleta di triatlon a competi den e ENNIA Kids Triathlon na Corsou cu a conta cu un participacion di mas cu 400 mucha y hoben unda Aruba a logra mayoria di e prome luganan disponibel den e diferente categorianan. Esaki sigur ta un muestra cu e federacion di triatlon na Aruba ta purba di engrandece e deporte bou di nos muchanan ya na un edad hopi jong.

Un danki sigur na Lotto, e Loteria di Aruba pa medio di Comision di Subsidio cu tambe a yuda subsidia e evento di KIds Aquathlon.

Cumprando weganan di Lotto, e Loteria di Aruba bo ta contribui na deporte riba nos isla. Meta di e fundacion ta pa organisa loteria, cambia bida di su hungadonan y na mes momento inverti den deporte local pa medio di donacionnan na e comision di subsidio.