ORANJESTAD, Aruba – 24 di september, 2015: Ya pa varios aña, Lotto, e loteria di Aruba via Comision di Subsidio ta subsidia e federacion di biyar esta FEBIAR cu nan campeonato y torneonan internacional bishita den exterior. Na numeroso ocasion e atletanan di biyar ta luci y saca cara di Aruba den torneonan internacional den nos region y continente.

Recientemente na nos hermana isla di Corsou a tuma luga un torneo di 9ball Open Cup entre Aruba, Boneiro y Corsou caminda algun hungado top di Aruba tambe a forma parti manera Ryan Rampersaud, Gunnar Leonardo, Richard Wolff, Patrick Henriquez y Ditto Acosta. Mester bisa cu un total di 30 hungado a participa na e torneo aki caminda na final e prome luga por a yama su mes e miho hungado entre e tres islanan di ABC.

Notabel ta cu Aruba a domina e circuito for di comienso te na final unda cu e hungadonan Ryan Rampersaud, Gunnar Leonardo y Ditto Acosta a gana tur nan weganan riba e prome dia. Diadomingo tabata e gran final unda e hungado Ryan Rampersaud ta gana un hungado Aleman den e gran final pa asina titula campeon di e 9 Ball Open Cup ABC. E hungadonan Leonard y Acosta e termina na di respectivo 4 y 5 luga.

Lotto, e Loteria di Aruba pa medio di Comision di Subsidio ta felicita e hungado Ryan Rampersaud y FEBIAR pa cu e titulo maximo den 9 Ball Open ABC Cup na Corsou
Cumprando weganan di Lotto, e Loteria di Aruba bo ta contribui na deporte riba nos isla. Meta di e fundacion ta pa organisa loteria, cambia bida di su hungadonan y na mes momento inverti den deporte local pa medio di donacionnan na e comision di subsidio.