ORANJESTAD, Aruba - 26 di januari, 2016: Durante cuater dia largo e federacion di ajedrez a tene nan prome torneo di anja celebrando e Copa Betico 2016. Un torneo cu a wordo hunga den tres categoria, esakinan den U-12, U-18 y Open. Mester bisa cu e participacion un bes mas tabata grandi unda un total di 46 atleta di ajedrez a inscribi pa e tremendo torneo aki. E weganan tur tabata riba un nivel halto caminda e hobennan a domina e prome torneo di anja 2016.

Pa loke ta e resultado final nos tin cu bisa cu den e categoria Open, e hoben Mark Bueno a domina y resulta e campeon absoluto di e Copa Betico 2016, na di dos luga a keda un otro hoben prospecto esta Jomar Benschop, mientras na di tres luga a termina e veterano Octavio Croes y e hoben Angel Ceteno. Den e categoria U-18 nos a haya den e mucha hombernan e hoben Dhruva Chatlani kende a keda na prome luga, sigui pa Ethan de Lange cu a termina na di dos luga y Tijn Hoogendam cu a keda na di tres luga.

Extra a duna dos premio esakinan den U-16 cu a bay pa e hoben Alberto Montoya y den U-14 esaki a bay pa Kabir Shetty. Den e categoria U-12 nos a haya den e mucha hombernan, na prome luga Ethan Croeze, na di dos luga Ilya Stetsenko y na tres luga Nathan Croes. Pa loke ta e mucha muhenan, na prome luga a keda Thamara Sagastegui, na di dos luga Lesley Cielo y na di tres luga a keda Aimara Ballestero.

Un danki sigur na Lotto, E Loteria di Aruba pa medio di Comision di Subsidio cu a subsidia e competencia di ajedrez riba Dia di Betico.
Cumprando weganan di Lotto, e Loteria di Aruba bo ta contribui na deporte riba nos isla. Meta di e fundacion ta pa organisa loteria, cambia bida di su hungadonan y na mes momento inverti den deporte local pa medio di donacionnan na e Comision di Subsidio.