ORANJESTAD, Aruba - 2 di augustus, 2016: E hoben prospecto den e deporte di tennis, Kayla Solognier recientemente a biaha pa e pais di El Salvador unda e lo hunga e torneo JITIC U-14. E hoben Solognier ta e unico tenista cu lo representa Aruba den e torneo aki. Algun siman atras, Kayla Solognier a atende un clinica di tennis na Merca cerca e conocido entrenador Arubano residencia na Florida, Mark van Romondt esaki como preparacion pa e torneo di JITIC U14. E torneo lo ta di 30 di juli pa cu 6 di augustus y hunto cu Kayla a biaha tambe coach Jonathan Goitia.

E weganan a inicia dia 31 di juli cu e cualificacion mientras cu Kayla Solognier lo hunga individual y doubles. Den su prome encuentro e lo mester enfrenta un competidor di Jamaica y den doubles Kayla Solagnier lo partner up hunto cu e tenista hoben procedente di nos hermana isla di Corsou, Sarinah Maduro. Kayla Solagnier ta den bon forma y ta cla pa bataya entre e miho hungadonan den nos region. Actualmente e ta wordo considera un di e miho tenistanan femenino y un bon prospecto pa Aruba. Den e torneo internacional di tennis TIHTA 2016 algun siman atras organisa na Aruba, Kayla a sa na briya logrando e premio maximo den e categoria femenino U14.

Un danki sigur na Lotto, e Loteria di Aruba pa medio di Comision di Subsidio cu a yuda subsidia e biahe di e tenista Kayla.

Cumprando weganan di Lotto, e Loteria di Aruba bo ta contribui na deporte riba nos isla. Meta di e fundacion ta pa organisa loteria, cambia bida di su hungadonan y na mes momento inverti den deporte local pa medio di donacionnan na e comision di subsidio.