ORANJESTAD, Aruba – 16 di april 2013: Den e fin di siman di 22 pa 24 di maart ultimo, Aruba tabata anfitrion di e Campeonato Sur y Centro Americano y del Caribe Masters 2013, unda cu a conta cu participacion di 7 pais y Aruba mes. Lotto tabata patrocinado di e evento deportivo aki y a keda hopi contento cu e resultado di Aruba, unda cu e atletanan a logra gana 8 medaya; 4 medaya di oro, 3 medaya di plata y 1 medaya di brons. 

Durante e fin di siman di e gran celebracion di Himno y Bandera, Aruba Taekwondo Association tambe a organisa su campeonato riba 22 di maart, den gymzaal di Princes Christina School na San Nicolaas. Esaki tabata e prome campeonato pa aña 2013 y Lotto a keda hopi contento di por a mira asina hopi atleta activo den e deporte aki, demostrando disciplina, motivacion y talento. 

Como parti di sostene deporte en general na Aruba y contribui pa engrandece nos deporte, Lotto, e loteria di Aruba, a patrocina e Campeonato di Little League Softball Aruba pa medio di Sport Subsidie Commissie, cu a duna inicio algun dia atras. Mester bisa cu poco poco e deporte aki ta creciendo y e acogida cerca nos muchanan y comunidad ta sigui crece. Sigur despues di e tremendo campeonato aki. 

 

E prome weganan a bay hopi bon mes, unda cu despues di un fabuloso apertura, a hunga 2 wega. E ekiponan presente den division di T-Ball, tabata; Rebels y Rascals,  den division di mayor tabata; Starz y Little Panthers y den division di seniors, tabata; Panthers, Sharks y Dolphins. 

Deporte ta sigui haya atencion di Lotto y diasabra ultimo no tabata un excepcion, durante e torneo di billiard, Billiard APT Tour Stop 1 (9Ball). Lotto como fundacion cu ta sponsor e eventonan deportivo,  y tambe e atletanan, pa medio di Subsidie Commissie, a patrocina e evento aki, cu sigur tin su fiel hungadonan.