Oranjestad, Aruba - 2 di september, 2015: Fin di luna di augustus Aruba a celebra un otro evento deportivo internacional, cu a conta cu participacion di varios participante di exterior, esaki na Villa Floralina. E Interpaso 2015 organisa pa e Organisacion Caballista Arubano, OCA, tawata uno masha grandi mirando cu e aña aki a celebra e di 30 aniversario di e competencia di cabay mas grandi riba nos isla. E diferente jinete y amazonanan di Aruba a competi contra di esunnan di Corsou, Merca, Republica Dominicano, Puerto Rico, Colombia y Venezuela. Entre e participantenan tawatin algun di nivel mundial cu ta bale la pena pa admira.

E deporte di Paso Fino semper a destaca internacionalmente cu algun bon jinete y amazona, manera Mark Bruin, Alina Mansur y Melanie Wever. E tres hobennan aki a logra titulonan mundial den nan deporte y a sa na laga nomber di nos dushi isla di Aruba resona den exterior. E biaha aki nan a competi na cas unda e presion sigur tawata mas grandi ainda. E competencia di Interpaso 2015 a inicia diabierna 28 di augustus pa 6or di atardi unda cu tawatin competencia di yeguas. Pa su mañan diasabra a start pa 5or di atardi cu e competencia di machos y tambe principiante Jinete y Amazona. E Interpaso 2015 a clausura diadomingo cuminsando pa 10or di mainta cu mercado di Santa Rosa y cu tawatin competencia di carne y cabrito, pa despues sigui cu e ultimo competencia di Jinete y Amazona.

Un danki sigur na Lotto, e Loteria di Aruba pa medio di Comision di Subsidio cu tambe a yuda subsidia e competencia di internacional di Interpaso 2015 organisa pa Organisacion Caballista Arubano.

Cumprando weganan di Lotto, e Loteria di Aruba bo ta contribui na deporte riba nos isla. Meta di e fundacion ta pa organisa loteria, cambia bida di su hungadonan y na mes momento inverti den deporte local pa medio di donacionnan na e comision di subsidio.