ORANJESTAD, Aruba - 3 di september, 2015: Pa engrandece e deporte di cricket na Aruba, e asociacion di cricket Arubano, ACA a tuma e iniciativa pa busca un entrenador certifica den nomber di Orin Bailey procedente di Guyana. E intencion ta cu sr. Bailey lo eherce diferente tarea pa e federacion. E lo coach e umpirenan di cricket como tambe e mes lo umpaya e weganan di campeonato cu a caba di inicia.
Na banda di esaki lo organisa clinicanan di cricket pa tur e cuater ekiponan y nan coachnan. Tambe e lo scout hungadonan hoben cu ta interesa den e deporte di cricket y lo duna conseho pa loke ta e seleccion nacional di cricket cu lo representa Aruba internacionalmente. Durante di torneonan internacional sr. Bailey lo coach e seleccion di cricket di Aruba.
Den e ultimo añanan e deporte di cricket a bira masha popular na Aruba. Actualmente tin cuater ekipo cu ta miembro di e asociacion di cricket Arubano.
Recientemente Aruba su seleccion di cricket a participa den un torneo internacional teni na Sint Maarten. Cricket ta un wega hunga cu un bat diki y mas hancho cu uno di baseball y un bala esaki entre dos ekipo di 11 hungado riba un tereno rectangular cu un largura di 22 yarda. Cada ekipo lo haya turno pa bati y trata na anota careda, mientras cu e resto di hungado di e otro ekipo ta riba tereno. Esunnan cu ta filia tin un lansando cu ta tira e bala unda e ta purba na out mas batiado cu ta posibel. Ora cu tur batiado sali out e rolnan ta cambia.
Aunke cu cricket ta un deporte no comun na Aruba, e maneho di esunnan concerni ta uno responsabel y hustifica mientras ta trata di tur manera di duna un empuhe pa engrandece esaki na Aruba. Pa tur interesado por contact Leroy Collins na 747-9181 of por e-mail na .
Un danki sigur na Lotto, e Loteria di Aruba pa medio di Comision di Subsidio cu a subsidia e binimento di coach Bailey pa yuda e federacion di cricket, A.C.A.
Cumprando weganan di Lotto, e Loteria di Aruba bo ta contribui na deporte riba nos isla. Meta di e fundacion ta pa organisa loteria, cambia bida di su hungadonan y na mes momento inverti den deporte local pa medio di donacionnan na e comision di subsidio.
