ORANJESTAD, Aruba - 9 di september, 2015: Awo cu e vakantie grandi ta tras di lomba, e temporada di baseball ta cla pa start pa tur e hoben pelotero den e diferente categorianan. E federacion di ABBA ya ta den pleno preparacion pa habri su campeonato di Liga Menor cual fecha di apertura ta programa pa diasabra awo 5 di september den stadion di Crismo Angela/Nadi Croes na Sta Cruz. Manera tur aña, un cantidad grandi di mucha y hobennan hunto cu nan coachnan lo desfila riba dia aki. Mas cu claro e lo bira uno extra special pa e mas chikitonan di 5 – 6 aña kendenan pa prome biaha lo cera conoci cu e wega di baseball.

Notabel ta mas cu 80 ekipo y 1400 basebolista den tur edad lo participa na e campeonato aki. E deporte di baseball tin un historia grandi y a produci profesionalnan cu a hunga den Mayor League Baseball manera Eugene Kingsale, Calvin Maduro, Rhadimis Dijkhoff, Sidney Ponson y mas recien Randolph Oduber, Shawn Zaraga y Xander Bogaerts. No mester lubida riba esnan cu ta hunga den e liga di baseball Hulandes cu tambe ta luci den Europa, manera Christian Diaz, Gilmar Lampe y otronan.

Na banda di tur nos peloteronan profesional, Aruba tin numeroso otro hoben den baseball cu a ser firma como prospecto den e deporte aki y tur ta luchando duro pa mira nan soño bira realidad. Pa cu esaki Lotto, e loteria di Aruba ta contento di por aporta y brinda e ayudo necesario na e federacion di baseball pa asina nan por realisa nan campeonato sin ningun obstaculo y lo sigui sostene e federacion di baseball ABBA esaki conforme cu e reglanan stipula pa otorga subsidio den 2016.

Un danki sigur na Lotto, e Loteria di Aruba pa medio di Comision di Subsidio cu a subsidia e campeonato di baseball Liga Menor di ABBA.