ORANJESTAD, Aruba - 10 di september, 2015: Despues di algun luna di competencia, e Copa Teams Betico Croes den e deporte di tennis di mesa a yega su final den A-klas y B-klas. Despues di e pasa den henter e proceso eliminatorio, e miho ekiponan di A-klas y B-klas mester a bataya pa e premio maximo.

Diamars 1 di September e weganan final a inicia unda cu den B-klas, e ekipo di Jon Tai consisti di Jhonatan Parades y Ching Ho Chung a gana di Universal Spin consisti di Lifrendy Lampe, Donald Yarzagaray y Micheal Kelly cu e score di 3 – 1. Mester bisa cu e ekipo di Universal Spin tabata e campeonnan defensor di aña 2014. Pa loke ta e final den A-klas esaki tabata mas preta den score unda cu e fuerte ekipo di Butterfly consisti di Mario Lobo y Michel Ling a gana Kawing Home Center consisti di Andy Gomes y Zhao Xie cu e score di 3 – 2.

E di dos wega di final a continua diamars 8 di September unda cu Jon Tai a logra titula campeon den B-klas ora nan ta gana e ekipo di Universal Spin cu e score di 3 – 0. Awo e ekipo di Jon Tai consisti di e hungadonan Jhonathan Parades y Ching Ho Chung lo promove pa A- klas. Den A-klas e lidernan di e campeonato esta e ekipo di Butterfly lo tin cu warda un siman mas mirando cu nan a ser sorprendi pa e ekipo di Kawin Home Center kende a triunfa cu e score di 3 – 2. Diamars awo un wega decisivo lo wordo hunga entre e dos ekiponan aki.

Un danki sigur na Lotto, e Loteria di Aruba pa medio di Comision di Subsidio cu a subsidia e e campeonato di Copa Teams Betico Croes di Ping Pong.

Cumprando weganan di Lotto, e Loteria di Aruba bo ta contribui na deporte riba nos isla. Meta di e fundacion ta pa organisa loteria, cambia bida di su hungadonan y na mes momento inverti den deporte local pa medio di donacionnan na e comision di subsidio.