fbpx

Lotto pa medio di Comision di Subsidio, como un di e sponsornan mas grandi di e di 26 Aruba Hi-Winds ta hopi satisfecho y orguyoso di e exito di e evento aki. Pa lunanan largo dos stagiaire, Ivar van Luyk y Reinier Middel, a traha ariba e preparacion di Hi-Winds y awe nan por ta hopi orguyoso di a forma parti di e comision organisado. For di februari nan tabatin ta traha, yudando organisa Aruba Hi-Winds, cual a tuma luga di dia 3 pa dia 9 di juli na Fishermen's Huts y Boca Grandi.

 

Participantenan a bin Aruba di tur parti di mundo pa competi den e diferente categorianan, di mucha pa adulto. Pero esunnan cu bista di tur hende tabata riba ta nos mes surfistanan di taya mundial, esta Ethan Westra kende ta campeon mundial den su clase y Steven Max cu a caba di bolbe di Francia celebrando su triunfo den freestyle.

 

E competencia cu a cuminsa como un competencia di windsurfing den añanan 80 a expande pa inclui un competencia di kitesurfing na Boca Grandi, tanten cu e caredanan di windsurfing a move di Eagle Beach pa Fishermen's Huts. Diferente banda manera Orange Grove, Datapanik, Honeypot, Time Banditsz y Earplugs, como tambe diferente DJ a tene e publico y deportistanan entreteni durante dia.

 

Aruba a conta cu presencia tambe di Josh Angulo, cu ta bin di un famia cu un historia largo den e mundo di windsurfing, como atleta, co-organisadornan di eventonan rond mundo y fabricantenan di ekipo pa windsurfing. Josh ta den e Top 10 di Professional Windsurfers Association (PWA) den e disciplina di slalom. Mescos cu su tata a trece Josh y su ruman homber Aruba ora cu nan tabata un mucha ora cu e tata tabata envolvi cu organisacion di Aruba Hi-Winds di parti di PWA, Josh a trece su yiu cun'e Aruba Hi-Winds. Asina e di tres generacion di famia Angulo a cera conoci cu nos isla.

 

"Nos ta hopi contento cu por a contribui na un evento asina anima, exitoso y di taya y fama internacional", asina representante di Lotto a bisa. "Aruba Hi-Winds ta conta cu e sosten di Lotto, e loteria di Aruba, pasobra no solamente e evento ta en curasha nos hobennan pa haci deporte, pero tambe e ta prueba cu esunnan cu ta stima nan deporte y nos pais por hiba nomber di Aruba na tur skina di mundo. Bintiseis aña despues di e prome Aruba Hi-Winds, nos por celebra awe e triunfonan di nos orguyo nan hobennan Sarah-Quita, Ethan y Steven y tur cu ta bin despues di nan, danki na esunnan cu a bini prome cu nan y pone e fundeshi pa cu windsurfing na Aruba.

{gallery}joomgallery/originals/aruba_hi-winds_2012_9{/gallery}

DMC Firewall is developed by Dean Marshall Consultancy Ltd