ORANJESTAD, Aruba - 2 di augustus, 2016: Pa dos siman largo, Aruba Sport Unie a organisa dirferente curso pa muchanan jong cu ta interesa den e area pa bira un referee den deporte. Na banda di e curso di referee a oferce un curso adicional di prome auxilio(EHBO) na e cursistanan. Diamars 2 di augustus a cuminsa cu e curso di arbitro den futbol unda a haya varios participante den e edad di 16 aña bay ariba, unda e mayoria ta muchanan di scol cu ta praktica e deporte di futbol.

E curso a tuma luga den Centro Deportivo Frans Figaroa na Noord y tabata bou encargo di e conocido arbitro femenino Mildred Wever. E curso lo dura te cu diabierna. Mester bisa cu den luna di juli a organisa dos curso di referee esakinan den e deporte di basketball y volleyball. Aruba Sport Unie den cooperacion cu Aruba Volleyball Bond y Baketball Bond a ofrece esaki unda e cursistanan a haya e parti di theoria di regla y praktica como tambe e prome auxilio duna door di e experto Eric Gomez. E curso di basketbal a wordo duna door di Darlaine Pardo, mientras cu Octavio Woodley y Elmer Robles de Medina tabata e dos instructornan den volleyball.

Un danki sigur na Lotto, e Loteria di Aruba pa medio di Comision di Subsidio cu a yuda subsidia e curso di referee pa e deporte colectivo organisa door di Aruba Sport Unie.

Cumprando weganan di Lotto, e Loteria di Aruba bo ta contribui na deporte riba nos isla. Meta di e fundacion ta pa organisa loteria, cambia bida di su hungadonan y na mes momento inverti den deporte local pa medio di donacionnan na e comision di subsidio.