fbpx

 

Durante e ceremonia, Minister Ing. Mike de Meza hunto cu director di Fundacion Lotto pa Deporte, Sr. Ronald van der Berg y gerente di mercadeo, Sr. Patrick Fortin, a hiba palabra na e invitadonan y a elabora riba e motibonan di cambio aki.

Lotto pa Deporte ta para pa su nomber, pasobra desde inicio di nan fundacion, dia 3 di december 1982, a bin cu e vision pa mediante loteria genera mas fondo pa deporte. Esaki debi cu deporte ta esencial y sigur fundamental pa cualkier desaroyo di un pais y su hendenan. 

Pero Lotto di Aruba no tabata destina solamente pa nos deportistanan, ya cu poco poco a cuminsa inverti tambe den e facilidadnan deportivo, sea ta mantencion of construccion. Un inversion cu sigur ta enorme pa un fundacion carga y no ta nada facil pa haci esaki si ta keda genera e mesun suma di placa cada biaha.

Den transcurso di tempo, Lotto pa Deporte a haya un luga special den nos comunidad y a bira e loteria di Aruba y nos tur como Arubiano ta sinti nos orguyoso di dje y p’esey mes a cambia e slogan y awo e ta: Cambiando bida. Lotto a demostra cu el a haci y ta haciendo hopi pa henter comunidad di Aruba. P’esey mes na dado momento, Lotto di Aruba a haya un otro perspectiva, ya cu poco poco e premio a cuminsa subi y nos hendenan a cuminsa gana balente suma di placa. N’e momento ey, Lotto a cuminsa haci hopi soño bira realidad y hopi hende a cuminsa pone nan speransa den Lotto, p’asina cumpli cu hopi soño, idea y pensamento. 

Lotto ta haya un identidad nobo, pero tur e weganan di semper ta keda mescos. E famoso Catochi Pro Deporte, ta haya e nomber di Catochi 4. Lotto pa Deporte ta bira Lotto 5 y MiniMega, Big 4 y Zodiac ta keda mescos. Lotto di Dia cu facilito ta bira Lotto di Dia y pa tur e fiel hungado- y ganadonan di Wega di Curacao, Lotto lo ta e rebendedor oficial di e Wega di Number Korsou. Pues djis algun cambio chikito pa loke ta trata nombernan di wega, pero e pago y sistema di hunga ta keda mescos. 

Claro cu e imagen nobo ta trece cune mas color, un imagen mas fresco y cu ta sigura di lo hiba e loteria na e siguiente nivel di crecemento. Hunto cu nan partner strategico "Canadian Bank Note" di Canada, e fundacion local ta sigur di por cambia mas bida aki na Aruba.

DMC Firewall is a Joomla Security extension!