E cuater ticketnan ganado a wordo cumpra na Cadena Alexander Paradera, Rina Highway, Lottery Center y Wara Wara Lottery. Di e 4 ganadonan aki, ya 3 ganado a pasa reclama nan premio na e oficina di Lotto y asina ricibi nan check na balor di 9.465 florin.

Ralgino W, un hungado cu pa prome biaha den su bida a dicidi di cumpra e wega di Mini Mega, a resulta como un feliz ganado y realmente e suerte di prome biaha como hungado a toca su porta. El a gana e suma di 9.465 florin, cu su ticket loco, cu el a cumpra na Wara Wara Lottery na Sta. Cruz y a bisa cu e placa aki, e lo bay pone riba banco mesora.

Elma C. regularmente ta den wega y tambe a gana e mesun suma di 9.465 florin. Durante cu e tabata na trabou, el a sinta pensa e numbernan y manera cu el a sali for di trabou, el a pasa cumpra su ticket eybanda mas, cu a resulta e rebendedo Cadena Alexander na Paradera. Semper e ta coy bus y awo e por cumpra su auto cu e premio aki.

Misael S.M., un cumprado di weganan di Lotto tur dia y casi semper na diferente rebendedo. Pa prome biaha el a cumpra na Rina Highway y a gana tambe. Misael a conta cu su casa no tabata kere cu el a gana. Te ora cu nan a yega oficina, e casa a haya sa cu Misael no tabata haci joke y cu el a gana casi 10 mil florin. Tur dos ta gusta hunga weganan di Raspa tambe y ta haya esaki hopi dibertido. El a laga sa cu awo e lo bay tuma poco tempo pa pensa kico e lo kier bay haci cu e premio bunita aki di casi 10 mil florin cu el a gana.

Lotto ainda falta 1 ganado di e di dos premio pa pasa busca su check. E ganado aki a cumpra su ticket na Lottery Center, pues si abo a cumpra bo ticket na Lottery Center controle bon paso kisas abo tin e ticket ganado. Pasa mes ora na oficina principal di Lotto, pa reclama bo premio.